ذرے ہی سہی کوہ سے ٹکرا تو گئے ہم

ذرے ہی سہی کوہ سے ٹکرا تو گئے ہم

دل لے کے سر عرصۂ غم آ تو گئے ہم

اب نام رہے یا نہ رہے عشق میں اپنا

روداد وفا دار پہ دہرا تو گئے ہم

کہتے تھے جو اب کوئی نہیں جاں سے گزرتا

لو جاں سے گزر کر انہیں جھٹلا تو گئے ہم

جاں اپنی گنوا کر کبھی گھر اپنا جلا کر

دل ان کا ہر اک طور سے بہلا تو گئے ہم

کچھ اور ہی عالم تھا پس چہرۂ یاراں

رہتا جو یونہی راز اسے پا تو گئے ہم

اب سوچ رہے ہیں کہ یہ ممکن ہی نہیں ہے

پھر ان سے نہ ملنے کی قسم کھا تو گئے ہم

اٹھیں کہ نہ اٹھیں یہ رضا ان کی ہے جالبؔ

لوگوں کو سر دار نظر آ تو گئے ہم

zarre hi sahi koh se takra to gae ham

dil le ke sar arsa-e-gham a to gae ham

ab nam rahe ya na rahe ishq mein apna

rudad-e-wafa dar pe dohra to gae ham

kahte the jo ab koi nahin jan se guzarta

lo jan se guzar kar unhen jhutla to gae ham

jan apni ganwa kar kabhi ghar apna jala kar

dil un ka har ik tur se bahla to gae ham

kuchh aur hi alam tha pas chehra-e-yaran

rahta jo yunhi raz use pa to gae ham

ab soch rahe hain ke ye mumkin hi nahin hai

phir un se na milne ki qasam kha to gae ham

uthen ke na uthen ye raza un ki hai jalib

logon ko sar-e-dar nazar a to gae ham