اس رعونت سے وہ جیتے ہیں کہ مرنا ہی نہیں

اس رعونت سے وہ جیتے ہیں کہ مرنا ہی نہیں

تخت پر بیٹھے ہیں یوں جیسے اترنا ہی نہیں

یوں مہ و انجم کی وادی میں اڑے پھرتے ہیں وہ

خاک کے ذروں پہ جیسے پاؤں دھرنا ہی نہیں

ان کا دعویٰ ہے کہ سورج بھی انہی کا ہے غلام

شب جو ہم پر آئی ہے اس کو گزرنا ہی نہیں

کیا علاج اس کا اگر ہو مدعا ان کا یہی

اہتمام رنگ و بو گلشن میں کرنا ہی نہیں

ظلم سے ہیں برسر پیکار آزادی پسند

ان پہاڑوں میں جہاں پر کوئی جھرنا ہی نہیں

دل بھی ان کے ہیں سیہ خوراک زنداں کی طرح

ان سے اپنا غم بیاں اب ہم کو کرنا ہی نہیں

انتہا کر لیں ستم کی لوگ ابھی ہیں خواب میں

جاگ اٹھے جب لوگ تو ان کو ٹھہرنا ہی نہیں

is raunat se wo jite hain ke marna hi nahin

takht par baithe hain yun jaise utarna hi nahin

yun mah-o-anjum ki wadi mein ure phirte hain wo

khak ke zarron pe jaise paon dharna hi nahin

un ka daawa hai ke suraj bhi unhi ka hai ghulam

shab jo ham par ai hai us ko guzarna hi nahin

kya ilaj us ka agar ho muddaa un ka yahi

ehtimam-e-rang-o-bu gulshan mein karna hi nahin

zulm se hain barsar-e-paikar azadi pasand

in paharon mein jahan par koi jharna hi nahin

dil bhi un ke hain siyah khurak zindan ki tarah

un se apna gham bayan ab ham ko karna hi nahin

intiha kar len sitam ki log abhi hain khwab mein

jag uthe jab log to un ko thaharna hi nahin