وہ دیکھنے مجھے آنا تو چاہتا ہوگا

وہ دیکھنے مجھے آنا تو چاہتا ہوگا

مگر زمانے کی باتوں سے ڈر گیا ہوگا

اسے تھا شوق بہت مجھ کو اچھا رکھنے کا

یہ شوق اوروں کو شاید برا لگا ہوگا

کبھی نہ حد ادب سے بڑھے تھے دیدہ و دل

وہ مجھ سے کس لیے کس بات پر خفا ہوگا

مجھے گمان ہے یہ بھی یقین کی حد تک

کسی سے بھی نہ وہ میری طرح ملا ہوگا

کبھی کبھی تو ستاروں کی چھاؤں میں وہ بھی

مرے خیال میں کچھ دیر جاگتا ہوگا

وہ اس کا سادہ و معصوم والہانہ پن

کسی بھی جگ میں کوئی دیوتا بھی کیا ہوگا

نہیں وہ آیا تو جالبؔ گلہ نہ کر اس کا

نہ جانے کیا اسے درپیش مسئلہ ہوگا

wo dekhne mujhe ana to chahta hoga

magar zamane ki baton se dar gaya hoga

use tha shauq bahut mujh ko achchha rakhne ka

ye shauq auron ko shayad bura laga hoga

kabhi na had-e-adab se barhe the dida-o-dil

wo mujh se kis liye kis bat par khafa hoga

mujhe guman hai ye bhi yaqin ki had tak

kisi se bhi na wo meri tarah mila hoga

kabhi kabhi to sitaron ki chhaon mein wo bhi

mire khayal mein kuchh der jagta hoga

wo us ka sada-o-maasum walhana pan

kisi bhi jag mein koi dewta bhi kya hoga

nahin wo aya to jalib gila na kar us ka

na jane kya use darpesh masala hoga