دل پر جو زخم ہیں وہ دکھائیں کسی کو کیا

دل پر جو زخم ہیں وہ دکھائیں کسی کو کیا

اپنا شریک درد بنائیں کسی کو کیا

ہر شخص اپنے اپنے غموں میں ہے مبتلا

زنداں میں اپنے ساتھ رلائیں کسی کو کیا

بچھڑے ہوئے وہ یار وہ چھوڑے ہوئے دیار

رہ رہ کے ہم کو یاد جو آئیں کسی کو کیا

رونے کو اپنے حال پہ تنہائی ہے بہت

اس انجمن میں خود پہ ہنسائیں کسی کو کیا

وہ بات چھیڑ جس میں جھلکتا ہو سب کا غم

یادیں کسی کی تجھ کو ستائیں کسی کو کیا

سوئے ہوئے ہیں لوگ تو ہوں گے سکون سے

ہم جاگنے کا روگ لگائیں کسی کو کیا

جالبؔ نہ آئے گا کوئی احوال پوچھنے

دیں شہر بے حساں میں صدائیں کسی کو کیا

dil par jo zakhm hain wo dikhaen kisi ko kya

apna sharik-e-dard banaen kisi ko kya

har shakhs apne apne ghamon mein hai mubtala

zindan main apne sath rulaen kisi ko kya

bichhre hue wo yar wo chhore hue dayar

rah rah ke ham ko yad jo aen kisi ko kya

rone ko apne hal pe tanhai hai bahut

is anjuman mein khud pe hansaen kisi ko kya

wo bat chher jis mein jhalakta ho sab ka gham

yaden kisi ki tujh ko sataen kisi ko kya

soe hue hain log to honge sukun se

ham jagne ka rog lagaen kisi ko kya

jalib na aega koi ahwal puchhne

den shahr-e-be hassan mein sadaen kisi ko kya