اپنوں نے وہ رنج دئے ہیں بیگانے یاد آتے ہیں

اپنوں نے وہ رنج دئے ہیں بیگانے یاد آتے ہیں

دیکھ کے اس بستی کی حالت ویرانے یاد آتے ہیں

اس نگری میں قدم قدم پہ سر کو جھکانا پڑتا ہے

اس نگری میں قدم قدم پر بت خانے یاد آتے ہیں

آنکھیں پر نم ہو جاتی ہیں غربت کے صحراؤں میں

جب اس رم جھم کی وادی کے افسانے یاد آتے ہیں

ایسے ایسے درد ملے ہیں نئے دیاروں میں ہم کو

بچھڑے ہوئے کچھ لوگ پرانے یارانے یاد آتے ہیں

جن کے کارن آج ہمارے حال پہ دنیا ہنستی ہے

کتنے ظالم چہرے جانے پہچانے یاد آتے ہیں

یوں نہ لٹی تھی گلیوں دولت اپنے اشکوں کی

روتے ہیں تو ہم کو اپنے غم خانے یاد آتے ہیں

کوئی تو پرچم لے کر نکلے اپنے گریباں کا جالبؔ

چاروں جانب سناٹا ہے دیوانے یاد آتے ہیں

apnon ne wo ranj diye hain begane yad ate hain

dekh ke is basti ki halat wirane yad ate hain

is nagri mein qadam qadam pe sar ko jhukana parta hai

is nagri mein qadam qadam par but khane yad ate hain

ankhen pur nam ho jati hain ghurbat ke sahraon mein

jab is ram jhim ki wadi ke afsane yad ate hain

aise aise dard mile hain nae dayaron mein ham ko

bichhre hue kuchh log purane yarane yad ate hain

jin ke karan aj hamare hal pe duniya hansti hai

kitne zalim chehre jane pahchane yad ate hain

yun na luti thi galiyon daulat apne ashkon ki

rote hain to ham ko apne gham khane yad ate hain

koi to parcham le kar nikle apne gareban ka jalib

charon janib sannata hai diwane yad ate hain