برگ بھر بار محبت کا اٹھایا کب تھا

برگ بھر بار محبت کا اٹھایا کب تھا

تم نے سینے میں کوئی درد بسایا کب تھا

اب جو خود سے بھی جدا ہو کے پھرو ہو بن میں

تم نے بستی میں کوئی دوست بنایا کب تھا

نقد احساس کہ انساں کا بھرم ہوتا ہے

ہم نے کھویا ہے کہاں آپ نے پایا کب تھا

شہر کا شہر امڈ آیا ہے دل جوئی کو

دشمنوں نے بھی تری طرح ستایا کب تھا

سعی صحرائے وفا سیر گلستاں کب تھی

دھوپ ہی دھوپ تھی ہر سو کوئی سایا کب تھا

عکس کیا کیا تھے نگاہوں میں فروزاں عالؔی

پر یہ انداز نظر وقت کو بھایا کب تھا

barg bhar bar mohabbat ka uthaya kab tha

tum ne sine mein koi dard basaya kab tha

ab jo khud se bhi juda ho ke phiro ho ban mein

tum ne basti mein koi dost banaya kab tha

naqd ehsas ke insan ka bharam hota hai

ham ne khoya hai kahan ap ne paya kab tha

shahr ka shahr umad aya hai dil joi ko

dushmanon ne bhi tiri tarah sataya kab tha

sai-e-sahra-e-wafa sair-e-gulistan kab thi

dhup hi dhup thi har su koi saya kab tha

aks kya kya the nigahon mein farozan ali

par ye andaz-e-nazar waqt ko bhaya kab tha