اور سب بھول گئے حرف صداقت لکھنا

اور سب بھول گئے حرف صداقت لکھنا

رہ گیا کام ہمارا ہی بغاوت لکھنا

لاکھ کہتے رہیں ظلمت کو نہ ظلمت لکھنا

ہم نے سیکھا نہیں پیارے بہ اجازت لکھنا

نہ صلے کی نہ ستائش کی تمنا ہم کو

حق میں لوگوں کے ہماری تو ہے عادت لکھنا

ہم نے جو بھول کے بھی شہہ کا قصیدہ نہ لکھا

شاید آیا اسی خوبی کی بدولت لکھنا

اس سے بڑھ کر مری تحسین بھلا کیا ہوگی

پڑھ کے نا خوش ہیں مرا صاحب ثروت لکھنا

دہر کے غم سے ہوا ربط تو ہم بھول گئے

سرو قامت کو جوانی کو قیامت لکھنا

کچھ بھی کہتے ہیں کہیں شہہ کے مصاحب جالبؔ

رنگ رکھنا یہی اپنا اسی صورت لکھنا

aur sab bhul gae harf-e-sadaqat likhna

rah gaya kam hamara hi baghawat likhna

lakh kahte rahen zulmat ko na zulmat likhna

ham ne sikha nahin pyare ba ijazat likhna

na sile ki na sataish ki tamanna ham ko

haq mein logon ke hamari to hai adat likhna

ham ne jo bhul ke bhi shah ka qasida na likha

shayad aya isi khubi ki badaulat likhna

is se barh kar miri tahsin bhala kya hogi

parh ke na khush hain mira sahab-e-sarwat likhna

dahr ke gham se hua rabt to ham bhul gae

sarw-e-qamat ko jawani ko qayamat likhna

kuchh bhi kahte hain kahin shah ke musahib jalib

rang rakhna yahi apna isi surat likhna