رات جو موج ہوا نے گل سے دل کی بات کہی

رات جو موج ہوا نے گل سے دل کی بات کہی

اک اک برگ چمن نے کیسی کیسی بات کہی

آنکھیں رنگ برنگ سجے رستوں سرشار ہوئیں

دل کی خلش نے منظر منظر ایک ہی بات کہی

ہر اظہار کی تہ میں ایک ہی معنی پنہا تھے

اپنی طرف سے سب نے اپنی اپنی بات کہی

آج بھی حرف و بیاں کے سب پیمانے حیراں ہیں

کیسے غزل نے دو سطروں میں پوری بات کہی

سیدھے سادے سے لفظوں میں کہنا مشکل تھا

اس لیے تو ایسی آڑی ترچھی بات کہی

تم کیوں اپنی مرضی کے مفہوم نکالو ہو

اتنا ہی مطلب ہے ہمارا جتنی بات کہی

تم بھی تو مضمون تراشی میں مصروف رہے

تم نے بھی تو عالؔی کم کم اصلی بات کہی

rat jo mauj hawa ne gul se dil ki bat kahi

ik ik barg-e-chaman ne kaisi kaisi bat kahi

ankhen rang barang saje raston sarshar huin

dil ki khalish ne manzar manzar ek hi bat kahi

har izhar ki tah mein ek hi maani panha the

apni taraf se sab ne apni apni bat kahi

aj bhi harf-o-bayan ke sab paimane hairan hain

kaise ghazal ne do satron mein puri bat kahi

sidhe sade se lafzon mein kahna mushkil tha

is liye to aisi ari tirchhi bat kahi

tum kyun apni marzi ke mafhum nikalo ho

itna hi matlab hai hamara jitni bat kahi

tum bhi to mazmun tarashi mein masruf rahe

tum ne bhi to ali kam kam asli bat kahi