کچھ اور مرے درد کے شعلوں کو ہوا دو
Jaleel 'Aali' (b. 1945)کچھ اور مرے درد کے شعلوں کو ہوا دو
بے نور ہوئے داغ اندھیرا ہے ضیا دو
پیچھے غم و اندوہ کے فرعون کا لشکر
آگے الم و یاس کا دریا ہے عصا دو
میں دشت غم عشق میں ہنستا ہوا آؤں
رستے سے غم دہر کی دیوار ہٹا دو
میں اور سلگتا ہوا صحرائے تجسس
بھٹکا ہوا راہی ہوں کوئی راہ دکھا دو
کیوں میری شکستوں کو سہارا نہیں ملتا
انسان ہوں محتاج خدا کا ہوں خدا دو
اس شہر میں جینے کی ہے اب ایک ہی صورت
احساس کے منصور کو سولی پہ چڑھا دو
اس دور کا سقراط ہوں سچ بول رہا ہوں
کیا دیر ہے کیوں چپ ہو مجھے زہر پلا دو
kuchh aur mire dard ke sholon ko hua do
be nur hue dagh andhera hai ziya do
pichhe gham-o-andoh ke firaun ka lashkar
age alam-o-yas ka dariya hai asa do
main dasht-e-gham ishq mein hansta hua aun
raste se gham dahr ki diwar hata do
main aur sulagta hua sahra-e-tajassus
bhatka hua rahi hun koi rah dikha do
kyun meri shikaston ko sahara nahin milta
insan hun mohtaj khuda ka hun khuda do
is shahr mein jine ki hai ab ek hi surat
ehsas ke mansur ko suli pe charha do
is daur ka suqrat hun sach bol raha hun
kya der hai kyun chup ho mujhe zahr pila do