ذرا سی بات پر صید غبار یاس ہونا

ذرا سی بات پر صید غبار یاس ہونا

ہمیں برباد کر دے گا بہت حساس ہونا

مسلسل کوئی سرگوشی ہمکتی ہے لہو میں

میسر ہی نہیں ہوتا پر اپنے پاس ہونا

سبھی سینوں میں تیری نوبتوں کی گونج لیکن

تری دھن کا کسی دل کی نوائے خاص ہونا

ہماری شوق راہوں پر کبھی دیکھے گی دنیا

تمہارے پتھروں کا گوہر و الماس ہونا

ادھر بھی تو اسے اک دن اٹھانی ہیں نگاہیں

ہمیں بھی تو کبھی ہونے کا ہے احساس ہونا

کسی موسم تو اپنے بادبانوں پر بھی عالؔی

لکھیں گے آشنا جھونکے ہوا کا راس ہونا

zara si bat par said-e-ghubar-e-yas hona

hamen barbad kar dega bahut hassas hona

musalsal koi sargoshi hamkiti hai lahu mein

muyassar hi nahin hota par apne pas hona

sabhi sinon mein teri naubaton ki gunj lekin

tiri dhun ka kisi dil ki nawa-e-khas hona

hamari shauq rahon par kabhi dekhegi duniya

tumhare pattharon ka gauhar-o-almas hona

idhar bhi to use ik din uthani hain nigahen

hamen bhi to kabhi hone ka hai ehsas hona

kisi mausam to apne badbanon par bhi ali

likhenge ashna jhonke hawa ka ras hona