اپنے ہونے کی اہانت نہیں ہم کر سکتے

اپنے ہونے کی اہانت نہیں ہم کر سکتے

سو تری یاد سے غفلت نہیں ہم کر سکتے

دل میں لاتے نہیں دشمن سے بھی نفرت کا خیال

اس سے کم کوئی عبادت نہیں ہم کر سکتے

دور رہتے ہیں تکبر کی ہوا سے لیکن

عجز کو غافل غیرت نہیں ہم کر سکتے

مصلحت سحر بہت پھونکتی پھرتی ہے بھرے

کم قد و قامت وحشت نہیں ہم کر سکتے

ڈھیر تفریح تن و جاں کے لگا دو جتنے

ترک اک درد کی دولت نہیں ہم کر سکتے

چھوڑ سکتے ہیں یہ سب صحن و در و بام جہاں

قریۂ خواب سے ہجرت نہیں ہم کر سکتے

تم زمیں پر جو خدا بنتے چلے جاتے ہو

کیا سمجھتے ہو بغاوت نہیں ہم کر سکتے

جس روش بھی ہو رواں غول زمانہ عالؔی

آپ سے کوئی رعایت نہیں ہم کر سکتے

apne hone ki ihanat nahin ham kar sakte

so tiri yad se ghaflat nahin ham kar sakte

dil mein late nahin dushman se bhi nafrat ka khayal

us se kam koi ibadat nahin ham kar sakte

dur rahte hain takabbur ki hawa se lekin

ijz ko ghafil ghairat nahin ham kar sakte

maslahat sehr bahut phunkti phirti hai bhare

kam qad-o-qamat-e-wahshat nahin ham kar sakte

dher tafrih tan-o-jan ke laga do jitne

tark ik dard ki daulat nahin ham kar sakte

chhor sakte hain ye sab sehn-o-dar-o-bam jahan

qarya-e-khwab se hijrat nahin ham kar sakte

tum zamin par jo khuda bante chale jate ho

kya samajhte ho baghawat nahin ham kar sakte

jis rawish bhi ho rawan ghaul zamana ali

ap se koi riayat nahin ham kar sakte