تمہارا کیا تمہیں آساں بہت رستے بدلنا ہے

تمہارا کیا تمہیں آساں بہت رستے بدلنا ہے

ہمیں ہر ایک موسم قافلے کے ساتھ چلنا ہے

بس اک ڈھلوان ہے جس پر لڑھکتے جا رہے ہیں ہم

ہمیں جانے نشیبوں میں کہاں جا کر سنبھلنا ہے

ہم اس ڈر سے کوئی سورج چمکنے ہی نہیں دیتے

کہ جانے شب کے اندھیاروں سے کیا منظر نکلنا ہے

ہمارے دل جزیرے پر اترتا ہی نہیں کوئی

کہیں کس سے کہ اس مٹی نے کس سانچے میں ڈھلنا ہے

نگاہیں پوچھتی پھرتی ہیں آوارہ ہواؤں سے

زمینوں نے زمانوں کا خزانہ کب اگلنا ہے

کسی معصوم سے جھونکے کی اک ہلکی سی دستک پر

انہی پتھر پہاڑوں سے کوئی چشمہ ابلنا ہے

tumhara kya tumhen asan bahut raste badalna hai

hamen har ek mausam qafile ke sath chalna hai

bas ik dhalwan hai jis par lurhakte ja rahe hain ham

hamen jane nashebon mein kahan ja kar sambhalna hai

ham is dar se koi suraj chamakne hi nahin dete

ke jane shab ke andhiyaron se kya manzar nikalna hai

hamare dil jazire par utarta hi nahin koi

kahin kis se ke is mitti ne kis sanche mein dhalna hai

nigahen puchhti phirti hain awara hawaon se

zaminon ne zamanon ka khazana kab ugalna hai

kisi maasum se jhonke ki ik halki si dastak par

unhi patthar paharon se koi chashma ubalna hai