کیا کیا دلوں کا خوف چھپانا پڑا ہمیں

کیا کیا دلوں کا خوف چھپانا پڑا ہمیں

خود ڈر گئے تو سب کو ڈرانا پڑا ہمیں

اک دوسرے سے بچ کے نکلنا محال تھا

اک دوسرے کو روند کے جانا پڑا ہمیں

اپنے دیے کو چاند بتانے کے واسطے

بستی کا ہر چراغ بجھانا پڑا ہمیں

وحشی ہوا نے ایسے برہنہ کئے بدن

اپنا لہو لباس بنانا پڑا ہمیں

ذیلی حکایتوں میں سبھی لوگ کھو گئے

قصہ تمام پھر سے سنانا پڑا ہمیں

عالؔی انا پہ سانحے کیا کیا گزر گئے

کس کس کی سمت ہاتھ بڑھانا پڑا ہمیں

kya kya dilon ka khauf chhupana para hamen

khud dar gae to sab ko darana para hamen

ik dusre se bach ke nikalna muhal tha

ik dusre ko raund ke jana para hamen

apne diye ko chand batane ke waste

basti ka har charagh bujhana para hamen

wahshi hawa ne aise barahna kiye badan

apna lahu libas banana para hamen

zaili hikayaton mein sabhi log kho gae

qissa tamam phir se sunana para hamen

ali ana pe sanehe kya kya guzar gae

kis kis ki samt hath barhana para hamen