دل آباد کہاں رہ پائے اس کی یاد بھلا دینے سے

دل آباد کہاں رہ پائے اس کی یاد بھلا دینے سے

کمرہ ویراں ہو جاتا ہے اک تصویر ہٹا دینے سے

بے تابی کچھ اور بڑھا دی ایک جھلک دکھلا دینے سے

پیاس بجھے کیسے صحرا کی دو بوندیں برسا دینے سے

ہنستی آنکھیں لہو رلائیں کھلتے گل چہرے مرجھائیں

کیا پائیں بے مہر ہوائیں دل دھاگے الجھا دینے سے

ہم کہ جنہیں تارے بونے تھے ہم کہ جنہیں سورج تھے اگانے

آس لیے بیٹھے ہیں سحر کی جلتے دیئے بجھا دینے سے

عالی شعر ہو یا افسانہ یا چاہت کا تانا بانا

لطف ادھورا رہ جاتا ہے پوری بات بتا دینے سے

dil abad kahan rah pae us ki yad bhala dene se

kamra wiran ho jata hai ik taswir hata dene se

be tabi kuchh aur barha di ek jhalak dikhla dene se

pyas bujhe kaise sahra ki do bunden barsa dene se

hansti ankhen lahu rulaen khulte gul chehre murjhaen

kya paen be mehr hawaen dil dhage uljha dene se

ham ke jinhen tare bone the ham ke jinhen suraj the ugane

as liye baithe hain sahar ki jalte diye bujha dene se

ali sher ho ya afsana ya chahat ka tana bana

lutf adhura rah jata hai puri bat bata dene se