نہ یہ بدلا نہ وہ بدلا نہ یہ دل کا جہاں بدلا

نہ یہ بدلا نہ وہ بدلا نہ یہ دل کا جہاں بدلا

اگر بدلا یہاں کچھ تو فقط وہ مہرباں بدلا

تمہیں بھی چین کی نیندیں یہاں سونے نہیں دیں گی

اگر اجداد کا تم نے ذرا سا بھی نشاں بدلا

زمانے میں بہت آیا تغیر دوستو لیکن

زمیں جیسی کی تیسی ہے نہ رنگ آسماں بدلا

ابھی تک لوگ قائم ہیں انہیں جھوٹی روایت پر

تمہاری حق بیانی سے کوئی آخر کہاں بدلا

ہمیشہ جس کے ہونٹوں پر محبت کی رہیں باتیں

خدا جانے کہ کیوں اس کا ہے انداز بیاں بدلا

قدم آگے بڑھاتا ہی رہا میں سخت راہوں پر

نہ ہمت ہی مری ٹوٹی نہ یہ عزم جواں بدلا

ہے ان کو آج بھی جاذلؔ وفاداری پہ شک لیکن

نہ ہم نے شاخ گل چھوڑی نہ ہم نے آشیاں بدلا

na ye badla na wo badla na ye dil ka jahan badla

agar badla yahan kuchh to faqat wo mehrban badla

tumhen bhi chain ki ninden yahan sone nahin dengi

agar ajdad ka tum ne zara sa bhi nishan badla

zamane mein bahut aya taghayyur dosto lekin

zamin jaisi ki taisi hai na rang-e-asman badla

abhi tak log qaim hain unhen jhuti riwayat par

tumhari haq bayani se koi akhir kahan badla

hamesha jis ke honton par mohabbat ki rahen baten

khuda jane ke kyun us ka hai andaz-e-bayan badla

qadam age barhata hi raha main sakht rahon par

na himmat hi miri tuti na ye azm-e-jawan badla

hai un ko aj bhi jazall wafadari pe shak lekin

na ham ne shakh-e-gul chhori na ham ne ashiyan badla