یہ صحرائے محبت ہے یہاں سایہ نہیں کوئی

یہ صحرائے محبت ہے یہاں سایہ نہیں کوئی

گزرتے جا رہے ہیں سب مگر رکتا نہیں کوئی

تمہیں سے میری وابستہ بہار زندگانی تھی

تمہارے بعد ان آنکھوں میں اب جچتا نہیں کوئی

چلو چل کر نئی دنیا کوئی آباد کرتے ہیں

کہ مظلوموں کی فریادیں یہاں سنتا نہیں کوئی

محبت کب کسی کو اس جہاں میں راس آئی ہے

تمہاری بے وفائی کا مجھے شکوہ نہیں کوئی

بیاباں کی طرح لگتی ہیں جب خاموش رہتی ہیں

چھلک جائے تو ان آنکھوں سا پھر دریا نہیں کوئی

وطن پہ جاں نثاری کا تو دعویٰ لوگ کرتے ہیں

کسی میں جاں لٹانے کا مگر جذبہ نہیں کوئی

سبھی آسودہ رہتے ہیں سکوں کی نیند سوتے ہیں

ہمارے شہر میں جاذلؔ ابھی بھوکا نہیں کوئی

ye sahra-e-mohabbat hai yahan saya nahin koi

guzarte ja rahe hain sab magar rukta nahin koi

tumhen se meri wabasta bahar-e-zindagani thi

tumhare baad in ankhon mein ab jachta nahin koi

chalo chal kar nai duniya koi abad karte hain

ke mazlumon ki fariyaden yahan sunta nahin koi

mohabbat kab kisi ko is jahan mein ras ai hai

tumhari be wafai ka mujhe shikwa nahin koi

bayaban ki tarah lagti hain jab khamosh rahti hain

chhalak jae to in ankhon sa phir dariya nahin koi

watan pe jan nisari ka to daawa log karte hain

kisi mein jan lutane ka magar jazba nahin koi

sabhi asuda rahte hain sukun ki nind sote hain

hamare shahr mein jazall abhi bhuka nahin koi