آنکھیں موندے سب کچھ بھولے کب سے یوں ہی بیٹھے ہیں

آنکھیں موندے سب کچھ بھولے کب سے یوں ہی بیٹھے ہیں

پلکوں پہ کچھ خواب سجائے جاگے جاگے سوئے ہیں

کس سے کیا رشتہ تھا میرا اب تو یہ بھی یاد نہیں

ریزہ ریزہ آئینہ ہے بکھرے بکھرے چہرے ہیں

اپنے گھر کی ویرانی کا ہم کس سے کیا حال کہیں

سونا سونا دروازہ ہے خالی خالی کمرے ہیں

تنہائی کے اندھیارے میں یادوں کی موہوم کرن

جیسے رات کی پیشانی پر جھلمل جھلمل تارے ہیں

تم سے کیا بتلائیں دل کا عالم کیا ہو جاتا ہے

بیتے موسم کی یادوں کے آنچل جب لہراتے ہیں

اب کے برس بھی ساون آ کر یوں ہی بیت گیا آخر

جلتے ہیں ہم اندر اندر آس کے پنچھی پیاسے ہیں

وقت کی بھٹی میں تپ تپ کر ہم نے یہ جانا بیتابؔ

سچا ہے اک درد کا رشتہ باقی رشتے جھوٹے ہیں

ankhen munde sab kuchh bhule kab se yun hi baithe hain

palkon pe kuchh khwab sajae jage jage soe hain

kis se kya rishta tha mera ab to ye bhi yad nahin

reza reza aina hai bikhre bikhre chehre hain

apne ghar ki wirani ka ham kis se kya hal kahin

sona sona darwaza hai khali khali kamre hain

tanhai ke andhiyare mein yadon ki mauhum kiran

jaise rat ki peshani par jhilmil jhilmil tare hain

tum se kya batlaen dil ka alam kya ho jata hai

bite mausam ki yadon ke anchal jab lahrate hain

ab ke baras bhi sawan a kar yun hi bit gaya akhir

jalte hain ham andar andar as ke panchhi pyase hain

waqt ki bhatti mein tap tap kar ham ne ye jana betab

sachcha hai ik dard ka rishta baqi rishte jhute hain