لو دینے لگا ہے تری یادوں کا دیا پھر

لو دینے لگا ہے تری یادوں کا دیا پھر

بہکے نہ کہیں دیکھنا جنگل کی ہوا پھر

تجدید محبت کا خیال آیا ہے اس کو

پائے نہ کہیں جرم وفا کی وہ سزا پھر

شاید کہ لی انگڑائی کسی چاند بدن نے

ہیجان سا خاموش سمندر میں اٹھا پھر

عفریت شب تار نے لب کھولے ہیں کیا کیا

خاموشیٔ صحرا سے اٹھے کوئی صدا پھر

پھر خواب سجانے لگے پلکوں پہ دوانے

بھونروں کو رجھانے لگی پھولوں کی ادا پھر

تم تھے کہ مرے پاؤں میں زنجیر تھی بیتابؔ

بے نام تعلق ہی سہی کیوں نہ رہا پھر

lo dene laga hai tiri yadon ka diya phir

bahke na kahin dekhna jangal ki hawa phir

tajdid-e-mohabbat ka khayal aya hai us ko

pae na kahin jurm-e-wafa ki wo saza phir

shayad ke li angrai kisi chand badan ne

haijan sa khamosh samundar mein utha phir

ifrit-e-shab tar ne lab khole hain kya kya

khamoshi-e-sahra se uthe koi sada phir

phir khwab sajane lage palkon pe diwane

bhaunron ko rijhane lagi phulon ki ada phir

tum the ke mire paon mein zanjir thi betab

be nam taalluq hi sahi kyun na raha phir