جب دشت تمنا میں کوئی پھول کھلا ہے

جب دشت تمنا میں کوئی پھول کھلا ہے

شہر دل خاموش سے اک شور اٹھا ہے

آنکھوں میں کھنڈر ہونٹوں پہ اک بھولا ہوا نام

چاہت میں کسی کی یہ عجب حال ہوا ہے

پھر یادوں کی دہلیز پہ جل اٹھی ہیں شمعیں

پھر پلکوں پہ بکھرا ہوا اک خواب سجا ہے

ہر سانس ہو تلوار سی جیسے رگ جاں پر

جینا بھی یہاں نام کسی معجزے کا ہے

خاموش بہت دیر سے ہے بحر حوادث

طوفان تہہ آب کوئی کھول رہا ہے

تم چاہو تو یہ آخری سرمایہ بھی لے لو

اک درد کی دولت کے سوا پاس ہی کیا ہے

بیتابؔ برس جانے دو آنکھوں کا یہ ساون

تنکوں کا بدن شعلوں کی باہوں میں گھرا ہے

jab dasht-e-tamanna mein koi phul khula hai

shahr-e-dil khamosh se ik shor utha hai

ankhon mein khandar honton pe ik bhula hua nam

chahat mein kisi ki ye ajab hal hua hai

phir yadon ki dahliz pe jal uthi hain shamen

phir palkon pe bikhra hua ik khwab saja hai

har sans ho talwar si jaise rag-e-jan par

jina bhi yahan nam kisi mojize ka hai

khamosh bahut der se hai bahr-e-hawadis

tufan-e-tah ab koi khol raha hai

tum chaho to ye akhiri sarmaya bhi le lo

ik dard ki daulat ke siwa pas hi kya hai

betab baras jane do ankhon ka ye sawan

tinkon ka badan sholon ki bahon mein ghira hai