لفظ و معنی کی یہ سب جھوٹی نمائش چھوڑ دے
Hafeez Betab (b. 1941)لفظ و معنی کی یہ سب جھوٹی نمائش چھوڑ دے
یوں ہمہ دانی کی ناداں اپنی خواہش چھوڑ دے
زد پہ آ جائے گا تیرا آئنہ بھی یاد رکھ
آئنوں پہ سنگ برسانے کی کوشش چھوڑ دے
آگ جب بھڑکے گی کوئی گھر نہ بچ پائے گا پھر
دوسروں کا گھر جلانے کی یہ سازش چھوڑ دے
بن نہ جائے وجہ رسوائی یہ تیری ایک دن
اپنے منہ سے اپنی ہی کرنا ستائش چھوڑ دے
کوئی دیوار انا قائم رہے کیوں درمیاں
جو دلوں کو دور کر دے ایسی رنجش چھوڑ دے
جو سرایت کر گیا بیتابؔ رگ رگ میں تری
اس کی یادوں کو بھلانے کی یہ کاوش چھوڑ دے
lafz-o-maani ki ye sab jhuti numaish chhor de
yun hama dani ki nadan apni khwahish chhor de
zad pe a jaega tera aina bhi yad rakh
ainon pe sang barasane ki koshish chhor de
ag jab bharkegi koi ghar na bach paega phir
dusron ka ghar jalane ki ye sazish chhor de
ban na jae wajh-e-ruswai ye teri ek din
apne munh se apni hi karna sataish chhor de
koi diwar-e-ana qaim rahe kyun darmiyan
jo dilon ko dur kar de aisi ranjish chhor de
jo sarayat kar gaya betab rag rag mein tiri
us ki yadon ko bhulane ki ye kawish chhor de