مری وفا کا نہ سوچا تھا یہ صلہ دے گا

مری وفا کا نہ سوچا تھا یہ صلہ دے گا

سمجھ کے حرف غلط وہ مجھے مٹا دے گا

بھلا وہ دے گا بھی مجھ کو تو اور کیا دے گا

غموں کی دھوپ میں جینے کی بس سزا دے گا

عجیب ضد ہے کہ الٹا ہی سوچتا ہے وہ

میں سچ کہوں گا اسے جھوٹ وہ بنا دے گا

ستم کا اس کے کچھ انداز ہی نرالا ہے

جو موت چاہوں گا جینے کی وہ دعا دے گا

یہ سوچتا ہوں اسے آئنہ دکھا ہی دوں

بہت کرے گا بھری بزم سے اٹھا دے گا

میں چھوڑ دوں اسے بیتابؔ کس طرح آخر

قدم قدم پہ مرا گھر مجھے صدا دے گا

miri wafa ka na socha tha ye sila dega

samajh ke harf-e-ghalat wo mujhe mita dega

bhala wo dega bhi mujh ko to aur kiya dega

ghamon ki dhup mein jine ki bas saza dega

ajib zid hai ke ulta hi sochta hai wo

main sach kahunga use jhut wo bana dega

sitam ka us ke kuchh andaz hi nirala hai

jo maut chahunga jine ki wo dua dega

ye sochta hun use aina dikha hi dun

bahut karega bhari bazm se utha dega

main chhor dun use betab kis tarah akhir

qadam qadam pe mira ghar mujhe sada dega