اس شہر تشنگی میں کہیں آب کے سوا

اس شہر تشنگی میں کہیں آب کے سوا

کچھ بھی نظر نہ آیا مجھے خواب کے سوا

پھر کس کے کام آئے گی میری شناوری

دریا میں کچھ نہ ہوگا جو گرداب کے سوا

اس روشنی میں جس سے منور ہے کائنات

سب کچھ دکھائی دیتا ہے مہتاب کے سوا

باغ جہاں کی سیر میں اب کیا بتاؤں میں

کیا کیا مجھے ملا گل شاداب کے سوا

یہ آنکھیں یہ دماغ یہ زخموں کا گھر بدن

سب محو خواب ہیں دل بے تاب کے سوا

اہل جنوں کو اس کی خبر دیر سے ہوئی

اک گھر بھی ہوگا دشت فسوں تاب کے سوا

is shahr tishnagi mein kahin ab ke siwa

kuchh bhi nazar na aya mujhe khwab ke siwa

phir kis ke kam aegi meri shinawari

dariya mein kuchh na hoga jo girdab ke siwa

is raushni mein jis se munawwar hai kainat

sab kuchh dikhai deta hai mahtab ke siwa

bagh-e-jahan ki sair mein ab kya bataun main

kya kya mujhe mila gul-e-shadab ke siwa

ye ankhen ye dimagh ye zakhmon ka ghar badan

sab mahw-e-khwab hain dil-e-be tab ke siwa

ahl-e-junun ko us ki khabar der se hui

ik ghar bhi hoga dasht-e-fusun tab ke siwa