زندگی اک خواب ہے یہ خواب کی تعبیر ہے

زندگی اک خواب ہے یہ خواب کی تعبیر ہے

حلقۂ گیسوئے دنیا پاؤں کی زنجیر ہے

کچھ نہیں اس کے سوا میرے تصرف میں یہاں

دل کا بس جتنا علاقہ درد کی جاگیر ہے

پتلیاں آنکھوں کی ساکت ہو گئیں پڑھتے ہوئے

آسماں پر کس زباں میں جانے کیا تحریر ہے

مجھ کو گویائی پہ اکسایا تھا دل نے ایک بار

آج تک ہونٹوں پہ قائم لذت تقریر ہے

اب نہ جانے کس طرف لے جائیں وحشی آندھیاں

شاخ سے ٹوٹا ہوا پتا بہت دلگیر ہے

سب بہادر ہیں یہاں ذکر اجل ہونے تلک

بزدلی اس کو کہوں یا خون کی تاثیر ہے

zindagi ik khwab hai ye khwab ki taabir hai

halqa-e-gesu-e-duniya paon ki zanjir hai

kuchh nahin us ke siwa mere tasarruf mein yahan

dil ka bas jitna ilaqa dard ki jagir hai

putliyan ankhon ki sakit ho gain parhte hue

asman par kis zaban mein jane kya tahrir hai

mujh ko goyai pe uksaya tha dil ne ek bar

aj tak honton pe qaim lazzat-e-taqrir hai

ab na jane kis taraf le jaen wahshi andhiyan

shakh se tuta hua patta bahut dilgir hai

sab bahadur hain yahan zikr-e-ajal hone talak

buzdili us ko kahun ya khun ki tasir hai