یہ جو تم دیکھ رہے ہو خس و خاشاک پہ خاک

یہ جو تم دیکھ رہے ہو خس و خاشاک پہ خاک

اس سے بڑھ کر ہے مری خواہش صد چاک پہ خاک

گر کوئی خواب نہیں ہے مری آنکھوں میں تو پھر

میرے سامان پہ حسرت مری املاک پہ خاک

میں نے اڑنے ہی نہیں دی ہے رہ عشق میں گرد

میں نے پڑنے ہی نہیں دی تری پوشاک پہ خاک

نسبت خاک پہ شرمندگی کیوں ہو مجھ کو

دستکیں دیتی ہے جا کر در لولاک پہ خاک

یہ جو تخصیص زن‌ و مرد ہے یہ وہم ہے بس

تم مجھے دیکھنا جب پہنچے مری چاک پہ خاک

یہ جو ہے آدمی کا عزم سفر اس کے طفیل

نظر آئے گی کسی دن رہ افلاک پہ خاک

یوں بھی تم کیا ہو فقط خاک تبسمؔ بی بی

اور پھر بیٹھنی ہے آ کے کل اس خاک پہ خاک

ye jo tum dekh rahe ho khas-o-khashak pe khak

is se barh kar hai miri khwahish-e-sad chak pe khak

gar koi khwab nahin hai miri ankhon mein to phir

mere saman pe hasrat miri amlak pe khak

main ne urne hi nahin di hai rah-e-ishq mein gard

main ne parne hi nahin di tiri poshak pe khak

nisbat khak pe sharmindagi kyun ho mujh ko

dastaken deti hai ja kar dar-e-laulak pe khak

ye jo takhsis zan-o-mard hai ye wahm hai bas

tum mujhe dekhna jab pahunche miri chak pe khak

ye jo hai admi ka azm-e-safar us ke tufail

nazar aegi kisi din rah-e-aflak pe khak

yun bhi tum kya ho faqat khak tabassum bi bi

aur phir baithni hai a ke kal is khak pe khak