سیاسی نفرتوں کی زد میں آئیں گے ہمیں کب تک

سیاسی نفرتوں کی زد میں آئیں گے ہمیں کب تک

بھگو کر شاہ رکھے گا لہو میں آستیں کب تک

کئی کنکر وفا کی جھیل میں میں پھینک آیا ہوں

ابھر کر سطح پہ آئیں گے دیکھیں تہ نشیں کب تک

بھرم کے پاؤں کی زنجیر کو سچ توڑ ہی دے گا

کسی کے جھوٹ پر کوئی کرے گا بھی یقیں کب تک

رکھے گا وقت ان کے روبرو بھی آئنہ اک دن

جہاں کے عیب ہی دیکھا کریں گے نکتہ چیں کب تک

نگاہوں سے ہی وہ ہر شخص کو کافر بنا دے گا

بچے گی یہ ہوس کے سائے سے روئے زمیں کب تک

نہ جانے کب رہا اس قید سے ہم ہوں گے اے ساحلؔ

ستائیں گے ہماری زیست کو یہ کفر و دیں کب تک

siyasi nafraton ki zad mein aenge hamen kab tak

bhigo kar shah rakhega lahu mein astin kab tak

kai kankar wafa ki jhil mein main phenk aya hun

ubhar kar sath pe aenge dekhen tah nashin kab tak

bharam ke paon ki zanjir ko sach tor hi dega

kisi ke jhut par koi karega bhi yaqin kab tak

rakhega waqt un ke rubaru bhi aina ik din

jahan ke aib hi dekha karenge nukta chin kab tak

nigahon se hi wo har shakhs ko kafir bana dega

bachchegi ye hawas ke sae se ru-e-zamin kab tak

na jane kab raha is qaid se ham honge ai sahil

sataenge hamari zist ko ye kufr-o-din kab tak