اہل غم آؤ ذرا سیر گلستاں کر لیں

اہل غم آؤ ذرا سیر گلستاں کر لیں

گر خزاں ہے تو چلو شغل بہاراں کر لیں

پھر تو ہر سمت اندھیرا ہی اندھیرا ہوگا

پو پھٹی ہے تو لٹی بزم چراغاں کر لیں

دل کی ویرانیاں آنکھوں میں اڑاتی ہیں غبار

مل کے رو لیں تو کچھ ان کو بھی فروزاں کر لیں

قہقہوں سے تو گھٹن اور بھی بڑھ جائے گی

آؤ چپ رہ کے ہی اس درد کا درماں کر لیں

شاید اس طرح بگولوں کا گزر ممکن ہو

اپنے ویرانے کو کچھ اور بھی ویراں کر لیں

ہم جو زندہ ہیں تو سب کہتے ہیں کیوں زندہ ہیں

آؤ مر کر بھی مسیحاؤں کو حیراں کر لیں

ahl-e-gham ao zara sair-e-gulistan kar len

gar khizan hai to chalo shaghl-e-baharan kar len

phir to har samt andhera hi andhera hoga

pau phati hai to luti bazm-e-charaghan kar len

dil ki wiraniyan ankhon mein urati hain ghubar

mil ke ro len to kuchh un ko bhi farozan kar len

qahqahon se to ghutan aur bhi barh jaegi

ao chup rah ke hi is dard ka darman kar len

shayad is tarah bagulon ka guzar mumkin ho

apne wirane ko kuchh aur bhi wiran kar len

ham jo zinda hain to sab kahte hain kyun zinda hain

ao mar kar bhi masihaon ko hairan kar len