Arooz is now on the App Store, for iPhone and iPad. Download →

All poetry

چوٹ نئی ہے لیکن زخم پرانا ہے

Parveen Fana Syed (1936–2010)

چوٹ نئی ہے لیکن زخم پرانا ہے

یہ چہرہ کتنا جانا پہچانا ہے

ساری بستی چپ کی دھند میں ڈوبی ہے

جس نے لب کھولے ہیں وہ دیوانا ہے

آؤ اس سقراط کا استقبال کریں

جس نے زہر کے گھونٹ کو امرت جانا ہے

اک اک کر کے سب پنچھی دم توڑ گئے

بھری بہار میں بھی گلشن ویرانہ ہے

اپنا پڑاؤ دشت وفا بے آب و گیاہ

تم کو تو دو چار قدم ہی جانا ہے

کل تک چاہت کے آنچل میں لپٹا تھا

آج وہ لمحہ خواب ہے یا افسانا ہے