کاش طوفاں میں سفینے کو اتارا ہوتا

کاش طوفاں میں سفینے کو اتارا ہوتا

ڈوب جاتا بھی تو موجوں نے ابھارا ہوتا

ہم تو ساحل کا تصور بھی مٹا سکتے تھے

لب ساحل سے جو ہلکا سا اشارا ہوتا

تم ہی واقف نہ تھے آداب جفا سے ورنہ

ہم نے ہر ظلم کو ہنس ہنس کے سہارا ہوتا

غم تو خیر اپنا مقدر ہے سو اس کا کیا ذکر

زہر بھی ہم کو بصد شوق گوارا ہوتا

باغباں تیری عنایت کا بھرم کیوں کھلتا

ایک بھی پھول جو گلشن میں ہمارا ہوتا

تم پر اسرار فنا راز بقا کھل جاتے

تم نے ایک بار تو یزداں کو پکارا ہوتا

kash tufan mein safine ko utara hota

dub jata bhi to maujon ne ubhara hota

ham to sahil ka tasawwur bhi mita sakte the

lab-e-sahil se jo halka sa ishara hota

tum hi waqif na the adab-e-jafa se warna

ham ne har zulm ko hans hans ke sahara hota

gham to khair apna muqaddar hai so us ka kya zikr

zahr bhi ham ko basad shauq gawara hota

baghban teri inayat ka bharam kyun khulta

ek bhi phul jo gulshan mein hamara hota

tum pur asrar fana raz-e-baqa khul jate

tum ne ek bar to yazdan ko pukara hota