ایک جیسے ہیں زمانے کے پریشاں صورت

ایک جیسے ہیں زمانے کے پریشاں صورت

وہی ویرانیٔ دل اور وہی ویراں صورت

منتظر بیٹھے ہیں اک عمر سے ہم تیرہ نصیب

شاید آ جائے کوئی شام چراغاں صورت

کب تلک دیکھیے اس زیست کے آئینے میں

وہی تنزیل حوادث وہی حیراں صورت

نعمتیں جب ہوئیں تقسیم سر روز ازل

ایک گلشن ملا ہم کو بھی بیاباں صورت

ہم نے ایسے بھی چمن دیکھے ہیں اس عالم میں

فصل گل میں جو نظر آئیں زمستاں صورت

رند بے فکر کی مانند پھرے آوارہ

وہی افسردگئ دل وہی خنداں صورت

ہم یہ کس کار گہہ شیشہ گراں کے ہیں اسیر

جہاں ہر بندہ نظر آتا ہے یزداں صورت

زندہ رہنے کے ہنر ہم نے وہیں سے سیکھے

درد بھی ہم کو ملا وہ جو ہے درماں صورت

کشت جاں تشنہ ہے اک عمر سے شاید کوئی

ابر آ جائے ادھر دیدۂ باراں صورت

حرم و دیر کی راہوں سے شناسا ہیں عروجؔ

ہم نے کافر بہت دیکھے ہیں مسلماں صورت

ek jaise hain zamane ke pareshan surat

wahi wirani-e-dil aur wahi wiran surat

muntazir baithe hain ik umr se ham tira nasib

shayad a jae koi sham-e-charaghan surat

kab talak dekhiye is zist ke aine mein

wahi tanzil-e-hawadis wahi hairan surat

nematen jab huin taqsim sar-e-roz-e-azal

ek gulshan mila ham ko bhi bayaban surat

ham ne aise bhi chaman dekhe hain is alam mein

fasl-e-gul mein jo nazar aen zamistan surat

rind-e-be fikr ki manind phire awara

wahi afsurdagi-e-dil wahi khandan surat

ham ye kis kar gah shisha giran ke hain asir

jahan har banda nazar ata hai yazdan surat

zinda rahne ke hunar ham ne wahin se sikhe

dard bhi ham ko mila wo jo hai darman surat

kisht-e-jan tishna hai ik umr se shayad koi

abr a jae idhar dida-e-baran surat

haram-o-dair ki rahon se shanasa hain uruj

ham ne kafir bahut dekhe hain musalman surat