اللہ بشر جاہ و حشم بیچ رہے ہیں

اللہ بشر جاہ و حشم بیچ رہے ہیں

خود ساختہ پتھر کے صنم بیچ رہے ہیں

مغرب کی تعفن زدہ تہذیب کے بدلے

ہم ارض مقدس کا حرم بیچ رہے ہیں

بے باک صداقت سے جو منسوب رہا ہے

دل روتا ہے کیوں لوگ قلم بیچ رہے ہیں

حیران ہوں میں سختیٔ جاں دیکھ کے ان کی

کس دل سے وہ روداد ستم بیچ رہے ہیں

پیشہ ہے کسی کا تو کوئی بھوک سے مجبور

بازار عدالت میں قسم بیچ رہے ہیں

ہجرت ہوئی اذہان پہ کچھ ایسے مسلط

وہ گھر تھا جو اک باغ ارم بیچ رہے ہیں

اسعدؔ یہاں مذہب ہے منافع کی تجارت

ہر موڑ پہ اب لوگ دھرم بیچ رہے ہیں

allah bashar jah-o-hasham bech rahe hain

khud sakhta patthar ke sanam bech rahe hain

maghrib ki taaffun zada tahzib ke badle

ham arz-e-muqaddas ka haram bech rahe hain

be bak sadaqat se jo mansub raha hai

dil rota hai kyun log qalam bech rahe hain

hairan hun main sakhti-e-jan dekh ke un ki

kis dil se wo rudad-e-sitam bech rahe hain

pesha hai kisi ka to koi bhuk se majbur

bazar adalat mein qasam bech rahe hain

hijrat hui azhan pe kuchh aise musallat

wo ghar tha jo ik bagh-e-iram bech rahe hain

asad yahan mazhab hai munafaa ki tijarat

har mor pe ab log dharm bech rahe hain