ملال و حسرت و بیم و رجا بہت کچھ ہے

ملال و حسرت و بیم و رجا بہت کچھ ہے

ہمارے پاس خدا کا دیا بہت کچھ ہے

متاع غم میں ابھی تک کمی نہیں آئی

اگرچہ راہ میں اپنا لٹا بہت کچھ ہے

خوشی اگر نہ ملی زندگی میں کیا غم ہے

ہمارے پاس خوشی کے سوا بہت کچھ ہے

یہ اور بات ہمیں تم نہ مل سکے لیکن

تمہاری بزم سے ہم کو ملا بہت کچھ ہے

وہ آج جس سے ہے یہ خاطر حزیں روشن

اسی کے شعلوں میں یہ دل جلا بہت کچھ ہے

ملی نہ داد سخن نا شناس لوگوں سے

سخن کا اپنے یہی اک صلہ بہت کچھ ہے

عروجؔ وہ ہی نہیں کہہ سکے جو کہنا تھا

سنا تو یہ تھا کہ تم نے کہا بہت کچھ ہے

malal-o-hasrat-o-bim-o-raja bahut kuchh hai

hamare pas khuda ka diya bahut kuchh hai

mata-e-gham mein abhi tak kami nahin ai

agarche rah mein apna luta bahut kuchh hai

khushi agar na mili zindagi mein kya gham hai

hamare pas khushi ke siwa bahut kuchh hai

ye aur bat hamen tum na mil sake lekin

tumhari bazm se ham ko mila bahut kuchh hai

wo aj jis se hai ye khatir-e-hazin raushan

usi ke sholon mein ye dil jala bahut kuchh hai

mili na dad-e-sukhan na shanas logon se

sukhan ka apne yahi ik sila bahut kuchh hai

uruj wo hi nahin kah sake jo kahna tha

suna to ye tha ke tum ne kaha bahut kuchh hai