دنیائے دل سجاؤں اگر میرا بس چلے

دنیائے دل سجاؤں اگر میرا بس چلے

اپنا تمہیں بناؤں اگر میرا بس چلے

ہے کوئی بات جس سے ہوں وارفتۂ خیال

تم کو نہ بھول جاؤں اگر میرا بس چلے

یہ اجنبی حیات یہ پیہم شکست دل

ہر شے کو بھول جاؤں اگر میرا بس چلے

ہر چند عرض شوق ہے پابند احتیاط

سب کچھ تمہیں سناؤں اگر میرا بس چلے

دراصل اک عذاب مسلسل ہے زندگی

دنیا سے لوٹ جاؤں اگر میرا بس چلے

میری وفا کو آپ نے تو آزما لیا

میں بھی تو آزماؤں اگر میرا بس چلے

میری تباہیوں پہ ہیں احباب خندہ زن

میں خود نہ مسکراؤں اگر میرا بس چلے

وجہ سکون زیست ہے رفعتؔ فریب دوست

پھر سے فریب کھاؤں اگر میرا بس چلے

duniya-e-dil sajaun agar mera bas chale

apna tumhen banaun agar mera bas chale

hai koi bat jis se hun warafta-e-khayal

tum ko na bhul jaun agar mera bas chale

ye ajnabi hayat ye paiham shikast-e-dil

har shai ko bhul jaun agar mera bas chale

har chand arz-e-shauq hai paband-e-ehtiyat

sab kuchh tumhen sunaun agar mera bas chale

darasl ik azab-e-musalsal hai zindagi

duniya se laut jaun agar mera bas chale

meri wafa ko ap ne to azma liya

main bhi to azmaun agar mera bas chale

meri tabahiyon pe hain ahbab khanda zan

main khud na muskuraun agar mera bas chale

wajh-e-sukun-e-zist hai rifat fareb-e-dost

phir se fareb khaun agar mera bas chale