مانتا نہیں میری حجتیں بھی کرتا ہے

مانتا نہیں میری حجتیں بھی کرتا ہے

بات بات میں اپنی جدتیں بھی کرتا ہے

آگ بھی لگاتا ہے آپ اپنے دامن میں

پھر اسے بجھانے کو بارشیں بھی کرتا ہے

عشق خود سے ہے اس کو اور خود ہی وہ پاگل

اپنا آپ کھونے کی سازشیں بھی کرتا ہے

دل میں جیتے رہنے کی آس بڑھتی رہتی ہے

ساتھ ساتھ مرنے کی خواہشیں بھی کرتا ہے

جاں کنی کے عالم میں یاد کر کے پیاروں کو

موت کے فرشتے سے منتیں بھی کرتا ہے

مجھ سے تھوڑا ڈرتا ہے پاس یوں نہیں آتا

باقیوں سے تو اکثر خلوتیں بھی کرتا ہے

مجھ سے کہتا رہتا ہے خوش رہا کرو ناں تم

اور دل دکھانے کی حرکتیں بھی کرتا ہے

بات بھی نہیں کرتا مجھ سے اور پھر اپنی

ایک ایک عادت میں منطقیں بھی کرتا ہے

کچھ الگ سا ہے سب سے کچھ عجب وہ ہے زہراؔ

اپنی ہر محبت میں شدتیں بھی کرتا ہے

manta nahin meri hujjaten bhi karta hai

bat bat main apni jiddaten bhi karta hai

ag bhi lagata hai ap apne daman mein

phir use bujhane ko barishen bhi karta hai

ishq khud se hai us ko aur khud hi wo pagal

apna ap khone ki sazishen bhi karta hai

dil mein jite rahne ki as barhti rahti hai

sath sath marne ki khwahishen bhi karta hai

jan kini ke alam mein yad kar ke pyaron ko

maut ke farishte se minnaten bhi karta hai

mujh se thora darta hai pas yun nahin ata

baqiyon se to aksar khalwaten bhi karta hai

mujh se kahta rahta hai khush raha karo nan tum

aur dil dikhane ki harkaten bhi karta hai

bat bhi nahin karta mujh se aur phir apni

ek ek adat mein mantiqen bhi karta hai

kuchh alag sa hai sab se kuchh ajab wo hai zahra

apni har mohabbat mein shiddaten bhi karta hai