آندھیاں غم کی چلیں اور کرب بادل چھا گئے

آندھیاں غم کی چلیں اور کرب بادل چھا گئے

تجھ سے کیسے ہو ملن سب راستے دھندلا گئے

کرچی کرچی خواہشیں آنکھوں میں چبھ کر رہ گئیں

زرد موسم آس کی ہریالیوں کو کھا گئے

میں کہ جس نے ہر صعوبت مسکرا کر جھیل لی

منزلیں آئیں تو کیوں آنکھوں میں آنسو آ گئے

تیرے نا آنے کے دکھ میں شدتیں پھولوں نے کیں

وقت سے پہلے ہی سب گجرے مرے مرجھا گئے

قحط جذبوں کا پڑا ویراں سے ہیں دل کے نگر

شہر پر آسیب شاید ہجر کے منڈلا گئے

دعویٰ چاہت کا نہیں پر جب اسے سوچا عروجؔ

پھول خوشبو رنگ تارے آنکھ میں لہرا گئے

andhiyan gham ki chalen aur karb badal chha gae

tujh se kaise ho milan sab raste dhundla gae

kirchi kirchi khwahishen ankhon mein chubh kar rah gain

zard mausam as ki hariyaliyon ko kha gae

main ke jis ne har suubat muskura kar jhil li

manzilen aen to kyun ankhon mein ansu a gae

tere na ane ke dukh mein shiddaten phulon ne kin

waqt se pahle hi sab gajre mire murjha gae

qaht jazbon ka para wiran se hain dil ke nagar

shahr par aseb shayad hijr ke mandla gae

daawa chahat ka nahin par jab use socha uruj

phul khushbu rang tare ankh mein lahra gae