نظر میں شائبۂ حسن یار آ جائے

نظر میں شائبۂ حسن یار آ جائے

جدھر نگاہ اٹھا دوں بہار آ جائے

بتاتے ہیں ترے کوچہ میں میری خیر احباب

مری طرف سے نہ دل میں غبار آ جائے

مری لحد پہ رقیبوں نے سنگ راہ لکھا

تمہارے دل میں نہ کوئی غبار آ جائے

مصر ہیں اس پہ وفائیں مری کہ اب تربت

بگولا بن کے سر راہ یار آ جائے

دکھا نہ ساقئ روز ازل مجھے اک دن

کہیں نہ زندگی بھر کو خمار آ جائے

جگانے قبر پہ گر روز حشر وہ آئیں

تو لطف گردش لیل و نہار آ جائے

الٰہی ہنس پڑے دوزخ بھی تیری رحمت پر

سمیٹوں آگ تو باغ و بہار آ جائے

طلب تو ہو دل عاشق سے کیا نہیں ممکن

یہ گر بضد ہو تو پروردگار آ جائے

وہیں تلاش کرو جلوہ گاہ ناز قدیرؔ

نظر جہاں وہ دل داغدار آ جائے

nazar mein shaiba-e-husn-e-yar a jae

jidhar nigah utha dun bahar a jae

batate hain tire kucha mein meri khair ahbab

miri taraf se na dil mein ghubar a jae

miri lahad pe raqibon ne sang-e-rah likha

tumhare dil mein na koi ghubar a jae

musir hain us pe wafaen miri ke ab turbat

bagula ban ke sar-e-rah-e-yar a jae

dikha na saqi-e-roz-e-azal mujhe ik din

kahin na zindagi bhar ko khumar a jae

jagane qabr pe gar roz-e-hashr wo aen

tu lutf gardish-e-lail-o-nahar a jae

ilahi hans pare dozakh bhi teri rahmat par

sametun ag to bagh-o-bahar a jae

talab to ho dil-e-ashiq se kya nahin mumkin

ye gar bazid ho to parwardigar a jae

wahin talash karo jalwa gah-e-naz qadir

nazar jahan wo dil daghdar a jae