داغہائے دل کی تابانی گئی

داغہائے دل کی تابانی گئی

ان کے جلووں کی فراوانی گئی

آشنا نا آشنا سے ہو گئے

اپنی صورت بھی نہ پہچانی گئی

ایک دل میں سیکڑوں غم کا ہجوم

پھر بھی اس گھر کی نہ ویرانی گئی

اب کہاں وہ جذبۂ مہر و وفا

آدمی سے خوئے انسانی گئی

آئینے میں وقت کے اے ہم نفس

دوستوں کی شکل پہچانی گئی

رہ گئے ہوش و خرد کے فلسفے

جستجو تا حد امکانی گئی

میرؔ و غالبؔ وحشتؔ و داغؔ و جگرؔ

کیا گئے آسیؔ غزل خوانی گئی

daghhae dil ki tabani gai

un ke jalwon ki farawani gai

ashna na ashna se ho gae

apni surat bhi na pahchani gai

ek dil mein saikron gham ka hujum

phir bhi is ghar ki na wirani gai

ab kahan wo jazba-e-mehr-o-wafa

admi se khu-e-insani gai

aine mein waqt ke ai ham nafas

doston ki shakl pahchani gai

rah gae hosh-o-khirad ke falsafe

justuju ta had-e-imkani gai

mir-o-ghalib wahshat-o-dagh-o-jigar

kya gae asi ghazal khwani gai