قسمت عجیب کھیل دکھاتی چلی گئی

قسمت عجیب کھیل دکھاتی چلی گئی

جو ہنس رہے تھے ان کو رلاتی چلی گئی

دل گویا حادثات مسلسل کا شہر ہو

دھڑکن بھی چیخ بن کے ڈراتی چلی گئی

کاغذ کی طرح ہو گئی بوسیدہ زندگی

تحریر حسرتوں کی مٹاتی چلی گئی

میں چاہتی نہیں تھی مگر پھر بھی جانے کیوں

آئی جو تیری یاد تو آتی چلی گئی

آنکھوں کی پتلیوں سے ترا عکس بھی گیا

یعنی چراغ میں تھی جو باتی چلی گئی

ڈھونڈا انہیں جو رات کی تنہائی میں حیاؔ

اک کہکشاں سی ذہن پہ چھاتی چلی گئی

qismat ajib khel dikhati chali gai

jo hans rahe the un ko rulati chali gai

dil goya hadsat musalsal ka shahr ho

dharkan bhi chikh ban ke darati chali gai

kaghaz ki tarah ho gai bosida zindagi

tahrir hasraton ki mitati chali gai

main chahti nahin thi magar phir bhi jane kyun

ai jo teri yad to ati chali gai

ankhon ki putliyon se tira aks bhi gaya

yaani charagh mein thi jo bati chali gai

dhunda unhen jo rat ki tanhai mein haya

ik kahkashan si zehn pe chhati chali gai