میں غزل ہوں مجھے جب آپ سنا کرتے ہیں

میں غزل ہوں مجھے جب آپ سنا کرتے ہیں

چند لمحے مرا غم بانٹ لیا کرتے ہیں

جب وفا کرتے ہیں ہم صرف وفا کرتے ہیں

اور جفا کرتے ہیں جب صرف جفا کرتے ہیں

لوگ چاہت کی کتابوں میں چھپا کر چہرے

صرف جسموں کی ہی تحریر پڑھا کرتے ہیں

لوگ نفرت کی فضاؤں میں بھی جی لیتے ہیں

ہم محبت کی ہوا سے بھی ڈرا کرتے ہیں

اپنے بچوں کے لئے لاکھ غریبی ہو مگر

ماں کے پلو میں کئی سکے ملا کرتے ہیں

جو کبھی خوش نہ ہوئے دیکھ کے شہرت میری

میرے اپنے ہیں مجھے پیار کیا کرتے ہیں

جن کے جذبات ہوں نقصان نفع کی زد میں

ان کے دل میں کئی بازار سجا کرتے ہیں

فکر و احساس پہ پردہ ہے حیاؔ کا ورنہ

ہم غلط بات نہ سنتے نہ کہا کرتے ہیں

main ghazal hun mujhe jab ap suna karte hain

chand lamhe mira gham bant liya karte hain

jab wafa karte hain ham sirf wafa karte hain

aur jafa karte hain jab sirf-e-jafa karte hain

log chahat ki kitabon mein chhupa kar chehre

sirf jismon ki hi tahrir parha karte hain

log nafrat ki fazaon mein bhi ji lete hain

ham mohabbat ki hawa se bhi dara karte hain

apne bachchon ke liye lakh gharibi ho magar

man ke palo mein kai sake mila karte hain

jo kabhi khush na hue dekh ke shohrat meri

mere apne hain mujhe pyar kiya karte hain

jin ke jazbat hun nuqsan nafa ki zad mein

un ke dil mein kai bazar saja karte hain

fikr-o-ehsas pe parda hai haya ka warna

ham ghalat bat na sunte na kaha karte hain