چمک رہے ہیں درانتی کے تیز دندانے

چمک رہے ہیں درانتی کے تیز دندانے

خمیدہ ہل کی یہ الھڑ جوان نور نظر

سنہری فصل میں جس وقت غوطہ زن ہوگی

تو ایک گیت چھڑے گا مسلسل اور دراز

ندیمؔ ازل سے ہے تخلیق کا یہی انداز

ستارے بوئے گئے آفتاب کاٹے گئے

ہم آفتاب ضمیر جہاں میں بوئیں گے

تو ایک روز عظیم انقلاب کاٹیں گے

کوئی بتائے زمیں کے اجارہ داروں کو

بلا رہے ہیں جو گزری ہوئی بہاروں کو

کہ آج بھی تو اسی شان بے نیازی سے

چمک رہے ہیں درانتی کے تیز دندانے

سنہری فصل تک اس کی چمک نہیں موقوف

کہ اب نظام کہن بھی اسی کی زد میں ہے

خمیدہ ہل کی یہ الھڑ جوان نور نظر

جب اس نظام میں لہرا کے غوطہ زن ہوگی

تو ایک گیت چھڑے گا مسلسل اور دراز

ندیمؔ ازل سے ہے تخلیق کا یہی انداز

ستارے بوئے گئے آفتاب کاٹے گئے

chamak rahe hain daranti ke tez dandane

khamida hal ki ye alhar jawan nur-e-nazar

sunahri fasl mein jis waqt ghauta zan hogi

to ek git chhirega musalsal aur daraz

nadim azal se hai takhliq ka yahi andaz

sitare boe gae aftab kate gae

ham aftab zamir-e-jahan mein boenge

to ek roz azim inqilab katenge

koi batae zamin ke ijara daron ko

bala rahe hain jo guzri hui baharon ko

ke aj bhi to isi shan-e-be niyazi se

chamak rahe hain daranti ke tez dandane

sunahri fasl tak us ki chamak nahin mauquf

ke ab nizam-e-kuhan bhi usi ki zad mein hai

khamida hal ki ye alhar jawan nur-e-nazar

jab is nizam mein lahra ke ghauta zan hogi

to ek git chhirega musalsal aur daraz

nadim azal se hai takhliq ka yahi andaz

sitare boe gae aftab kate gae