ریستوراں میں سجے ہوئے ہیں کیسے کیسے چہرے

ریستوراں میں سجے ہوئے ہیں کیسے کیسے چہرے

قبروں کے کتبوں پر جیسے مسلے مسلے سہرے

اک صاحب جو سوچ رہے ہیں پچھلے ایک پہر سے

یوں لگتے ہیں جیسے بچہ روٹھ آیا ہو گھر سے

کافی کی پیالی کو لبوں تک لائیں تو کیسے لائیں

بیرے تک سے آنکھ ملا کر بات جو نہ کر پائیں

کتنی سنجیدہ بیٹھی ہے یہ احباب کی ٹولی

کتنے اوج بلاغت پر ہے خاموشی کی بولی

ساری قوت چوس چکی دن بھر کی شہر نوردی

ماتھوں میں سے جھانک رہی ہے مرتی دھوپ کی زردی

لمبی لمبی پلکیں جھپکے اک شرمیلی بی بی

بالوں کی ترتیب سے جھلکے ذہن کی بے ترتیبی

شوہر کو دیکھے تو لجائے لاج کو اوٹ بنائے

ہر آنے والے پر اک بھرپور نظر دوڑائے

اک لڑکی اور تین جوان آئے ہیں کسے کسائے

سانولے روپ کو گورے ملکوں کا بہروپ بنائے

باتوں میں نخوت باغوں کی وحشت صحراؤں کی

آنکھوں کے چولہوں میں بھری ہے راکھ تمناؤں کی

اپنی اپنی الجھن سب کی اپنی اپنی رائے

سب نے آنسو روک رکھے ہیں کون کسے بہلائے

ہر شے پر شک ہو تو جینا ایک سزا بن جائے

محور ہی موجود نہ ہو تو گردش کس کام آئے

قہقہے جیسے خالی برتن لڑھک لڑھک کر ٹوٹیں

بحثیں جیسے ہونٹوں میں سے خون کے چھینٹے چھوٹیں

حسن کا ذکر کریں یوں جیسے آندھی پھول کھلائے

فن کی بات کریں یوں جیسے بنیا شعر سنائے

سکڑی سمٹی روحیں لیکن جسم ہیں دوہرے تہرے

ریستوراں میں سجے ہوئے ہیں کیسے کیسے چہرے

resturan mein saje hue hain kaise kaise chehre

qabron ke katbon par jaise masle masle sehre

ik sahab jo soch rahe hain pichhle ek pahar se

yun lagte hain jaise bachcha ruth aya ho ghar se

kafi ki piyali ko labon tak laen to kaise laen

baire tak se ankh mila kar bat jo na kar paen

kitni sanjida baithi hai ye ahbab ki toli

kitne auj-e-balaghat par hai khamoshi ki boli

sari quwwat chus chuki din bhar ki shahr nawardi

mathon mein se jhank rahi hai marti dhup ki zardi

lambi lambi palken jhapke ik sharmili bi bi

balon ki tartib se jhalke zehn ki be tartibi

shauhar ko dekhe to lajae laj ko ot banae

har ane wale par ik bharpur nazar daurae

ik larki aur tin jawan ae hain kise kasae

sanwale rup ko gore mulkon ka bahrup banae

baton mein nakhwat baghon ki wahshat sahraon ki

ankhon ke chulhun mein bhari hai rakh tamannaon ki

apni apni uljhan sab ki apni apni rae

sab ne ansu rok rakhe hain kaun kise bahlae

har shai par shak ho to jina ek saza ban jae

mehwar hi maujud na ho to gardish kis kam ae

qahqahe jaise khali bartan lurhak lurhak kar tuten

bahsen jaise honton mein se khun ke chhinte chhuten

husn ka zikr karen yun jaise andhi phul khilae

fan ki bat karen yun jaise baniya sher sunae

sukri simti ruhen lekin jism hain dohre tahre

resturan mein saje hue hain kaise kaise chehre