مجھے تو مژدۂ کیفیت دوامی دے

مجھے تو مژدۂ کیفیت دوامی دے

مرے خدا مجھے اعزاز ناتمامی دے

میں تیرے چشمۂ رحمت سے کام کام رہوں

کبھی کبھی مجھے احساس تشنہ کامی دے

مجھے کسی بھی معزز کا ہم رکاب نہ کر

میں خود کماؤں جسے بس وہ نیک نامی دے

وہ لوگ جو کئی صدیوں سے ہیں نشیب نشیں

بلند ہوں تو مجھے بھی بلند بامی دے

تری زمین یہ تیرے چمن رہیں آباد

جو دشت دل ہے اسے بھی تو لالہ فامی دے

بڑا سرور سہی تجھ سے ہم کلامی میں

بس ایک بار مگر ذوق خود کلامی دے

میں دوستوں کی طرح خاک اڑا نہیں سکتا

میں گرد راہ سہی مجھ کو نرم گامی دے

اگر گروں تو کچھ اس طرح سر بلند گروں

کہ مار کر مرا دشمن مجھے سلامی دے

mujhe to muzhda-e-kaifiyat-e-dawami de

mire khuda mujhe ezaz natamami de

main tere chashma-e-rahmat se kam kam rahun

kabhi kabhi mujhe ehsas-e-tishna kami de

mujhe kisi bhi muazzaz ka ham rikab na kar

main khud kamaun jise bas wo nek nami de

wo log jo kai sadiyon se hain nasheb nashin

buland hun to mujhe bhi buland bami de

tiri zamin ye tere chaman rahen abad

jo dasht-e-dil hai use bhi to lala fami de

bara surur sahi tujh se ham kalami mein

bas ek bar magar zauq-e-khud kalami de

main doston ki tarah khak ura nahin sakta

main gard-e-rah sahi mujh ko narm gami de

agar girun to kuchh is tarah sar buland girun

ke mar kar mira dushman mujhe salami de