مجھے سمیٹو

مجھے سمیٹو

میں ریزہ ریزہ بکھر رہا ہوں

نہ جانے میں بڑھ رہا ہوں

یا اپنے ہی غبار سفر میں ہر پل اتر رہا ہوں

نہ جانے میں جی رہا ہوں

یا اپنے ہی تراشے ہوئے نئے راستوں کی تنہائیوں میں ہر لحظہ مر رہا ہوں

میں ایک پتھر سہی مگر ہر سوال کا بازگشت بن کر جواب دوں گا

مجھے پکارو مجھے صدا دو

میں ایک صحرا سہی مگر مجھ پہ گھر کے برسو

مجھے مہکنے کا ولولہ دو

میں اک سمندر سہی مگر، آفتاب کی طرح مجھ پہ چمکو

مجھے بلندی کی سمت اڑنے کا حوصلہ دو

مجھے نہ توڑو کہ میں گل تر سہی

مگر اوس کے بجائے لہو میں تر ہوں

مجھے نہ مارو

میں زندگی کے جمال اور گہماگہمیوں کا پیامبر ہوں

مجھے بچاؤ کہ میں زمیں ہوں

کروڑوں کروڑوں کی کائنات بسیط میں صرف میں ہی ہوں

جو خدا کا گھر ہوں

mujhe sameto

main reza reza bikhar raha hun

na jane mein barh raha hun

ya apne hi ghubar-e-safar mein har pal utar raha hun

na jane mein ji raha hun

ya apne hi tarashe hue nae raston ki tanhaiyon mein har lahza mar raha hun

main ek patthar sahi magar har sawal ka bazgasht ban kar jawab dunga

mujhe pukaro mujhe sada do

main ek sahra sahi magar mujh pe ghar ke barso

mujhe mahakne ka walwala do

main ik samundar sahi magar, aftab ki tarah mujh pe chamko

mujhe bulandi ki samt urne ka hausla do

mujhe na toro ke main gul-e-tar sahi

magar os ke bajae lahu mein tar hun

mujhe na maro

main zindagi ke jamal aur gahmaghamiyon ka payambar hun

mujhe bachao ke main zamin hun

karoron karoron ki kainat basit mein sirf main hi hun

jo khuda ka ghar hun