دل سلگ اٹھتا ہے اپنے بام و در کو دیکھ کر

دل سلگ اٹھتا ہے اپنے بام و در کو دیکھ کر

پھیلنے لگتی ہیں جب بھی شام کی پرچھائیاں

اس قدر ویران لمحے اس قدر سنسان رات

سوچ میں گم ہیں افق سے تا افق پہنائیاں

کس لیے روشن کروں دیوار و در کوئی تو ہو

گنگ دیواروں میں کیا ہوں انجمن آرائیاں

دور ہر شب جاگ اٹھتے ہیں کئی ماہ و نجوم

آگ بھڑکاتی ہیں سنگ و خشت کی رعنائیاں

راستوں سے خواب گاہوں تک مسلسل موج رنگ

جس طرح قوس قزح کی ٹوٹتی انگڑائیاں

زخم نظارہ لیے آنکھوں میں چپ تکتا رہا

گو مری نیندیں بھی مجھ سے لے اڑیں شہنائیاں

کل ذرا سی دیر چمکے تھے مرے دیوار و در

جھلملا اٹھی تھیں میری روح کی گہرائیاں

چند لمحوں کے لیے لو دے اٹھا تھا اک چراغ

اور دمک اٹھی تھیں کچھ لمحے مری تنہائیاں

آج اتنا شور کیوں ہے اے مرے بے درد شہر

ہر نظر میری طرف ہے اس قدر رسوائیاں

dil sulag uthta hai apne bam-o-dar ko dekh kar

phailne lagti hain jab bhi sham ki parchhaiyan

is qadar wiran lamhe is qadar sunsan rat

soch mein gum hain ufuq se ta ufuq pahnaiyan

kis liye raushan karun diwar-o-dar koi to ho

gang-e-diwaron mein kya hun anjuman araiyan

dur har shab jag uthte hain kai mah-o-nujum

ag bharakiti hain sang-o-khisht ki raanaiyan

raston se khwab gahon tak musalsal mauj-e-rang

jis tarah qaus-e-quzah ki tutti angraiyan

zakhm-e-nazzara liye ankhon mein chup takta raha

go miri ninden bhi mujh se le uren shahnaiyan

kal zara si der chamke the mire diwar-o-dar

jhilmila uthi thin meri ruh ki gahraiyan

chand lamhon ke liye lo de utha tha ik charagh

aur damak uthi thin kuchh lamhe miri tanhaiyan

aj itna shor kyun hai ai mire be dard shahr

har nazar meri taraf hai is qadar ruswaiyan