میرے شہر کے سارے رستے بند ہیں لوگو

میرے شہر کے سارے رستے بند ہیں لوگو

میں اس شہر کا نغمہ گر

جو دو اک موسم غربت کے دکھ جھیل کے آیا

تاکہ اپنے گھر کی دیواروں سے

اپنی تھکی ہوئی اور ترسی ہوئی

آنکھیں سہلاؤں

اپنے دروازے کے اترتے روغن کو

اپنے اشکوں سے صیقل کر لوں

اپنے چمن کے جلے ہوئے پودوں

اور گرد آلود درختوں کی

مردہ شاخوں پر بین کروں

ہر مہجور ستون کو اتنا ٹوٹ کے چوموں

میرے لبوں کے خون سے

ان کے نقش و نگار سبھی جی اٹھیں

گلی کے لوگوں کو اتنا دیکھوں

اتنا دیکھوں

میری آنکھیں

برسوں کی ترسی ہوئی آنکھیں

چہروں کے آنگن بن جائیں

پھر میں اپنا ساز اٹھاؤں

آنسوؤں اور مسکانوں سے جھلمل جھلمل

نظمیں غزلیں گیت سناؤں

اپنے پیاروں

درد کے ماروں کا درماں بن جاؤں

لیکن میرے شہر کے سارے رستوں پر

اب باڑ ہے لوہے کے کانٹوں کی

شہ دروازے پر کچھ پہرے دار کھڑے ہیں

جو مجھ سے اور مجھ جیسے دل والوں کی

پہچان سے عاری

میرے ساز سے

سنگینوں سے بات کریں

میں ان سے کہتا ہوں

دیکھو

میں اس شہر کا نغمہ گر ہوں

برسوں بعد کڑی راہوں کی

ساری اذیت جھیل کے اب واپس آیا ہوں

اس مٹی کی خاطر

جس کی خوشبوئیں

دنیا بھر کی دوشیزاؤں کے جسموں کی مہکوں سے

اور سارے جہاں کے

سبھی گلابوں سے

بڑھ کر ہے

مجھ کو شہر میں

میرے شہر میں جانے دو

لیکن تنے ہوئے نیزوں نے

میرے جسم کو یوں برمایا

میرے ساز کو یوں ریزایا

میرا ہمکتا خون اور میرے سسکتے نغمے

شہ دروازے کی دہلیز سے

رستے رستے

شہر کے اندر جا پہنچے ہیں

اور میں اپنے جسم کا ملبہ

ساز کا لاشہ

اپنے شہر کے شہ دروازے

کی دہلیز پہ چھوڑ کے

پھر انجانے شہروں کی شہراہوں پر

مجبور سفر ہوں

جن کو تج کر گھر آیا تھا

جن کو تج کر گھر آیا تھا

mere shahr ke sare raste band hain logo

main is shahr ka naghma gar

jo do ik mausam ghurbat ke dukh jhil ke aya

take apne ghar ki diwaron se

apni thaki hui aur tarsi hui

ankhen sehlaun

apne darwaze ke utarte roghan ko

apne ashkon se saiqal kar lun

apne chaman ke jale hue podun

aur gard alud darakhton ki

murda shakhon par bain karun

har mahjur sutun ko itna tut ke chumun

mere labon ke khun se

un ke naqsh-o-nigar sabhi ji uthen

gali ke logon ko itna dekhun

itna dekhun

meri ankhen

barson ki tarsi hui ankhen

chehron ke angan ban jaen

phir main apna saz uthaun

ansuon aur muskanon se jhilmil jhilmil

nazmen ghazlen git sunaun

apne pyaron

dard ke maron ka darman ban jaun

lekin mere shahr ke sare raston par

ab bar hai lohe ke kanton ki

shah darwaze par kuchh pahre dar khare hain

jo mujh se aur mujh jaise dil walon ki

pahchan se ari

mere saz se

sanginon se bat karen

main un se kahta hun

dekho

main is shahr ka naghma gar hun

barson baad kari rahon ki

sari aziyyat jhil ke ab wapas aya hun

is mitti ki khatir

jis ki khushbuen

duniya bhar ki doshizaon ke jismon ki mahkon se

aur sare jahan ke

sabhi gulabon se

barh kar hai

mujh ko shahr mein

mere shahr mein jane do

lekin tane hue nezon ne

mere jism ko yun barmaya

mere saz ko yun rezaya

mera hamkutta khun aur mere sisakte naghme

shah darwaze ki dahliz se

raste raste

shahr ke andar ja pahunche hain

aur main apne jism ka malba

saz ka lasha

apne shahr ke shah darwaze

ki dahliz pe chhor ke

phir anjane shahron ki shahruhun par

majbur safar hun

jin ko taj kar ghar aya tha

jin ko taj kar ghar aya tha