میورکا کے ساحلوں پہ کس قدر گلاب تھے

میورکا کے ساحلوں پہ کس قدر گلاب تھے

کہ خوشبوئیں تھی بے طرح کہ رنگ بے حساب تھے

تنک لباسیاں شناوروں کی تھیں قیامتیں

تمام سیم تن شریک جشن شہر آب تھے

شعاع مہر کی ضیا سے تھے جگر جگر بدن

قمر جمال جن کے عکس روشنی کے باب تھے

کھلی فضا کی دھوپ وہ کہ جسم سانولے کرے

بتان آذری کہ مست غسل آفتاب تھے

یہیں پتہ چلا کہ زیست حسن ہے بہار ہے

یہیں خبر ہوئی کہ زندگی کے دکھ سراب تھے

یہیں لگا کہ گردشوں کے زاویے بدل گئے

نہ روز و شب کی تلخیاں نہ وقت کے عذاب تھے

مرے تمام دوست اجنبی رفاقتوں میں گم

مری نظر میں تیرے خد و خال تیرے خواب تھے

میں دوریوں کے باوجود تیرے آس پاس تھا

میورکا کے ساحلوں پہ میں بہت اداس تھا

miwruka ke sahilon pe kis qadar gulab the

ke khushbuen thi be tarah ke rang be hisab the

tunuk libasiyan shanaoron ki thin qayamaten

tamam sim tan sharik-e-jashn-e-shahr ab the

shua-e-mehr ki ziya se the jigar jigar badan

qamar jamal jin ke aks raushni ke bab the

khuli faza ki dhup wo ke jism sanwale kare

butan-e-azari ke mast ghusl aftab the

yahin pata chala ke zist husn hai bahar hai

yahin khabar hui ke zindagi ke dukh sarab the

yahin laga ke gardishon ke zawiye badal gae

na roz-o-shab ki talkhiyan na waqt ke azab the

mire tamam dost ajnabi rifaqaton mein gum

miri nazar mein tere khad-o-khal tere khwab the

main duriyon ke bawajud tere as pas tha

miwruka ke sahilon pe main bahut udas tha