درد کی آگ بجھا دو کہ ابھی وقت نہیں

درد کی آگ بجھا دو کہ ابھی وقت نہیں

زخم دل جاگ سکے نشتر غم رقص کرے

جو بھی سانسوں میں گھلا ہے اسے عریاں نہ کرو

چپ بھی شعلہ ہے مگر کوئی نہ الزام دھرے

ایسے الزام کہ خود اپنے تراشے ہوئے بت

جذبۂ کاوش خالق کو نگوں سار کریں

مو قلم حلقۂ ابرو کو بنا دے خنجر

لفظ نوحوں میں رقم مدح رخ یار کریں

رقص مینا سے اٹھے نغمۂ رقص بسمل

ساز خود اپنے مغنی کو گنہ گار کریں

مرہم اشک نہیں زخم طلب کا چارہ

خوں بھی روؤگے تو کس خاک کی سج دھج ہوگی

کانپتے ہاتھوں سے ٹوٹی ہوئی بنیادوں پر

جو بھی دیوار اٹھاؤ گے وہی کج ہوگی

کوئی پتھر ہو کہ نغمہ کوئی پیکر ہو کہ رنگ

جو بھی تصویر بناؤ گے اپاہج ہوگی

dard ki ag bujha do ke abhi waqt nahin

zakhm-e-dil jag sake nashtar-e-gham raqs kare

jo bhi sanson mein ghula hai use uryan na karo

chup bhi shola hai magar koi na ilzam dhare

aise ilzam ke khud apne tarashe hue but

jazba-e-kawish-e-khaliq ko nigun sar karen

mu qalam halqa-e-abru ko bana de khanjar

lafz nauhon mein raqam madh rukh-e-yar karen

raqs-e-mina se uthe naghma-e-raqs-e-bismil

saz khud apne mughanni ko gunah gar karen

marham-e-ashk nahin zakhm talab ka chara

khun bhi rooge to kis khak ki saj dhaj hogi

kanpte hathon se tuti hui buniyadon par

jo bhi diwar uthaoge wahi kaj hogi

koi patthar ho ke naghma koi paikar ho ke rang

jo bhi taswir banaoge apahaj hogi