اے سیہ فام حسینہ ترا عریاں پیکر

اے سیہ فام حسینہ ترا عریاں پیکر

کتنی پتھرائی ہوئی آنکھوں میں غلطیدہ ہے

جانے کس دور الم ناک سے لے کر اب تک

تو کڑے وقت کے زندانوں میں خوابیدہ ہے

تیرے سب رنگ ہیولے کے یہ بے جان نقوش

جیسے مربوط خیالات کے تانے بانے

یہ تری سانولی رنگت یہ پریشان خطوط

بارہا جیسے مٹایا ہو انہیں دنیا نے

ریشۂ سنگ سے کھینچی ہوئی زلفیں جیسے

راستے سینۂ کہسار پہ بل کھاتے ہیں

ابروؤں کی جھکی محرابوں میں جامد پلکیں

جس طرح تیر کمانوں میں الجھ جاتے ہیں

منجمد ہونٹوں پہ سناٹوں کا سنگین طلسم

جیسے نایاب خزانوں پہ کڑے پہرے ہوں

تند جذبات سے بھرپور برہنہ سینہ

جیسے سستانے کو طوفان ذرا ٹھہرے ہوں

جیسے یونان کے مغرور خدا وندوں نے

ریگزاران حبش کی کسی شہزادی کو

تشنہ روحوں کے ہوس ناک تعیش کے لئے

حجلۂ سنگ میں پابند بنا رکھا ہو

ai siyah fam hasina tira uryan paikar

kitni pathrai hui ankhon mein ghalatida hai

jane kis daur-e-alam nak se le kar ab tak

tu kare waqt ke zindanon mein khwabida hai

tere sab rang haiwle ke ye be jan nuqush

jaise marbut khayalat ke tane bane

ye tiri sanwli rangat ye pareshan khutut

barha jaise mitaya ho unhen duniya ne

resha-e-sang se khinchi hui zulfen jaise

raste sina-e-kohsar pe bal khate hain

abruon ki jhuki mehrabon mein jamid palken

jis tarah tir kamanon mein ulajh jate hain

munjamid honton pe sannaton ka sangin tilism

jaise nayab khazanon pe kare pahre hun

tund jazbat se bharpur barahna sina

jaise sustane ko tufan zara thahre hun

jaise yunan ke maghrur khuda wandun ne

regzaran habash ki kisi shahzadi ko

tishna ruhon ke hawas nak taayyush ke liye

hajla-e-sang mein paband bana rakha ho