مرے پیارے بچے

مرے پیارے بچے

بڑا ظلم تم پر ہوا ہے

بہ یک جنبش سر تمہیں اپنی مسند سے معزول ہونا پڑا ہے

سمجھ میں نہیں آتا ایسی خطا کیا ہوئی تم سے

مانا کہ تم اپنے بھائیوں سے ٹھگنے تھے

یا پھر تمہارا ٹھکانا مقرر نہیں تھا

تم اپنی حدوں سے بھٹک کر کسی اور کے دائرے میں

در انداز ہوتے تھے

میں جانتا ہوں تمہارے بدن پر سے اندوہ کا سیل گزرا ہے

لیکن مری بات کا تم برا مت منانا

اگر میں کہوں یہ کہ تم پہلے ہی دن سے اس مسند‌‌ عالیہ کے تقدس

کے لائق نہیں تھے

سو جتنے برس تم نے اس سوانگ میں کر و فر سے گزارے ہیں

ان پر قناعت کرو

اور زمیں کے کسی دور افتادہ گوشے میں

مکتب کو جاتے ہوئے ایک بچے کی آنکھوں سے

یہ بات سن کر

اگر ایک آنسو گرا ہے

اسے سینت کر طاقچے میں سجا لو

خلاؤں کے یخ بستہ بے نور پاتال میں یہ ستارہ تمہارا سہارا بنے گا

mire pyare bachche

bara zulm tum par hua hai

ba yak jumbish-e-sar tumhen apni masnad se maazul hona para hai

samajh mein nahin ata aisi khata kya hui tum se

mana ke tum apne bhaiyon se thagne the

ya phir tumhara thikana muqarrar nahin tha

tum apni hadon se bhatak kar kisi aur ke daire mein

dar andaz hote the

main janta hun tumhare badan par se andoh ka sail guzra hai

lekin miri bat ka tum bura mat manana

agar main kahun ye ke tum pahle hi din se is masnad aliya ke taqaddus

ke laiq nahin the

so jitne baras tum ne is sawang mein kar-o-far se guzare hain

un par qanaat karo

aur zamin ke kisi dur uftada goshe mein

maktab ko jate hue ek bachche ki ankhon se

ye bat sun kar

agar ek ansu gira hai

use sint kar taqche mein saja lo

khalaon ke yakh basta be nur patal mein ye sitara tumhara sahara banega