میر باقر علی

میر باقر علی

تم نے پھر بیچ میں داستاں روک دی

شاہ گل فام گنجل طلسموں کی گتھیوں کو سلجھاتا

صرصار جنگل کے شعلہ نفس اژدہوں سے نمٹتا

بیابان حیرت کی بے انت وسعت کو سر کر کے

پہرے پہ مامور یک چشم دیووں کی نظریں بچا

سبز قلعے کی اونچی کگر پھاند کر

مہ جبیں کے معنبر شبستان تک آن پہنچا ہے

اور اس طرف حق و طاغوت مد مقابل ہیں

جری سورما آمنے سامنے ہنہناتے الف ہوتے گھوڑوں پہ زانو جمائے ہوئے منتظر ہیں

ابھی طبل پر تھاپ پڑنے کو ہے

اور ادھر شاہزادہ طلسمی محل کے حسیں دودھیا برج میں شاہ زادی کے حجلے کے اندر

ابھی لاجوردی چھپر کھٹ کا زر بفت پردہ اٹھا ہی رہا ہے

مگر میر باقر علی تم نے پھر بیچ میں داستاں روک دی

راہداری منقش در و بام ست رنگ قالین بلور قندیل فوارہ بربط سناتا

جھروکوں پہ لہراتے پردوں کی قوس قزح

میمنہ میسرہ قلب ساقہ جناح

آہنی خود سے جھانکتی مرتعش پتلیاں

رزم گہہ کی کڑی دھوپ میں ایک ساکت پھریرا

چھپر کھٹ پہ سوئی ہوئی شاہ زادی کے پیروں پہ مہندی کی بیلیں

فصاحت کے دریا بہاتے چلے جا رہے ہو

بلاغت کے موتی لٹاتے چلے جا رہے ہو

مگر میر باقر علی داستاں گو سنو

داستاں سننے والے تو صدیاں ہوئیں اٹھ کے جا بھی چکے ہیں

تم اپنے طلسماتی قصے کے پر پیچ تاگوں میں ایسے لپٹتے گئے ہو

کہ تم کو خبر ہی نہیں

سامنے والی نکڑ پہ اک آنے کی بائیسکوپ آ گئی ہے

mir baqir ali

tum ne phir bich mein dastan rok di

shah gul fam ginjal tilismon ki gutthiyon ko sulajhita

sarsar jangal ke shola nafas azhdahon se nimatta

bayaban hairat ki be ant wusat ko sar kar ke

pahre pe mamur yak chashm dewon ki nazren bacha

sabz qile ki unchi kagar phand kar

mah jabin ke muambar shabistan tak an pahuncha hai

aur is taraf haq-o-taghut mad-e-muqabil hain

jari surma amanne samne hinhinate alif hote ghoron pe zanu jamae hue muntazir hain

abhi tabal par thap parne ko hai

aur idhar shahzada tilismi mahal ke hasin dudhiya biraj mein shah zadi ke hajle ke andar

abhi lajwardi chhappar khit ka zar bafat parda utha hi raha hai

magar mir baqir ali tum ne phir bich mein dastan rok di

rahdari munaqqash dar-o-bam sat rang qalin bilur qindil fawwara barbat sunata

jharokon pe lahrate pardon ki qaus-e-quzah

maimana mayasara qalb saqa jinah

ahani khud se jhankti murtaish putliyan

razm gah ki kari dhup mein ek sakit pharera

chhappar khit pe soi hui shah zadi ke pairon pe mehndi ki belen

fasahat ke dariya bahate chale ja rahe ho

balaghat ke moti lutate chale ja rahe ho

magar mir baqir ali dastan go suno

dastan sunne wale to sadiyan huin uth ke ja bhi chuke hain

tum apne tilismati qisse ke pur pech tagon mein aise lipatte gae ho

ke tum ko khabar hi nahin

samne wali nukkar pe ik ane ki baisikup a gai hai