Arooz is now on the App Store, for iPhone and iPad. Download →

All poetry

گیہوں کیا شے ہے باجرا کیا ہے

Yakta Amrohvi (b. 1945)

گیہوں کیا شے ہے باجرا کیا ہے

اور چاول ہے کیا چنا کیا ہے

اف یہ بستہ مرے خدا کیا ہے

مری تقدیر میں لکھا کیا ہے

یہ اسکول اور مدرسہ کیا ہے

ان کے کھلنے کا مدعا کیا ہے

آج تک یہ سمجھ میں آ نہ سکا

لکھنے پڑھنے سے فائدہ کیا ہے

یہ کتابیں یہ کاپیاں یہ قلم

ان میں کچھ تو کہو دھرا کیا ہے

بس کتابوں بھرا بڑا بستہ

اور ماں باپ نے دیا کیا ہے

ماسٹر مجھ کو مارتے کیوں ہیں

میں نے ان کو بھلا کہا کیا ہے

آدمی سے بنا دیا مرغا

اور اس سے بڑی سزا کیا ہے

دیر چھٹی میں کیا ہے دیکھوں تو

اب گھڑی میں مری بجا کیا ہے

ہم کو امی یہ پہلے بتلا دو

چائے کے ساتھ ناشتہ کیا ہے

جس نے کھائے نہ ہوں وہ کیا جانے

رس بھری کیا ہے غلغلہ کیا ہے

سو گدھوں پر شکیل ہے بھاری

سامنے اس کے اک گدھا کیا ہے

سر منڈا کر وہ آ رہا ہے طفیل

بڑھ کے دے ٹیپ دیکھتا کیا ہے

بات یکتاؔ کی مان اپنے لیے

سوچ اچھا ہے کیا برا کیا ہے